Qendra Polifunksionale në Shushicë të Elbasanit është një ndër qendrat që është ngritur me mbështetjen e Ministrisë së Shëndetësisë dhe Mbrojtjes Sociale, përmes instrumentit të Fondit Social për pushtetin vendor.
Në një aktivitet të organizuar në ambientet e kësaj qendre, për të prezantuar shërbimet sociale të qarkut të Elbasanit, merrnin pjesë Ministrja e Shëndetësisë dhe Mbrojtjes Sociale Ogerta Manastirliu, Drejtuesi Politik i Qarkut Elbasan të PS, Damian Gjiknuri, kryetarët e bashkive të qarkut Elbasan, si edhe partnerë nga organizata të ndryshme.
Në fjalën e saj, ministrja Manastirliu tha se në tre vjet janë ngritur 40 shërbime sociale në territor, përmes Fondit Social.
“Kemi mundësuar ngritjen e 40 qendrave sociale dhe shërbimeve sociale në bashki dhe në qarqe. Qarku i Elbasanit është një qark kampion për rritjen dhe zgjerimin e shërbimeve sociale me modele fantastike në territor. Deri më sot kemi mundësuar që më shumë se 10 mijë e 400 individë përfshirë nga fëmijët, deri tek të moshuarit që marrin shërbime shumë kualitative, me standardet e miratuara nga Fondi Social, nëpërmjet përkushtimit dhe punës të bashkive tona”, tha Manastirliu.
Ministrja Manastirliu në fjalën e saj, vlerësoi faktin se shërbimet e reja të ngritura në bashki, përmes mekanizmit financiar të qeverisë, atë të Fondit Social, po realizohen me profesionistë të fushës.
“Janë 287 profesionistë, nga punonjës socialë, tek psikologë, tek kujdestarët, tek ndihmësit në rrjetin e shërbimeve sociale të financuara nga Fondi Social, që punojnë me kategoritë në nevojë. Kemi garantuar që nëpërmjet statusit të Punonjësit Social, çdo punonjës social, ashtu sikurse çdo psikolog, është i licensuar. Pra dimë, që shërbimet sociale bëhen nga profesionistë që dinë veprojnë, që kemi garanci që veprojnë sipas protokolleve dhe standardeve më të mira dhe mbështesin më këto standarde të gjitha kategoritë apo individët që janë në nevojë dhe marrin shërbime në këto qendra”, tha Manastirliu.
Manastirliu bëri me dije se një risi do të jetë ofrimi i shërbimeve sociale të lëvizshme për t’u ardhur në ndihmë të gjithë individëve që nuk kanë mundësi për t’i aksesuar këto qendra në territor. Nga ana e tij, kryebashkiaku i Elbasanit Gledian Llatja ka referuar me shifra të gjithë menaxhimin që Bashkia ofron për Planin e Mbrojtjes Sociale, ndërsa shtoi se “bashkia Elbasan nepermjet Planit të Mbrojtjes Sociale është përpjekur të ketë vizion të qartë për ndërtimin e një sistemi mbrojtjeje sociale që të luftojë pabarazitë social-ekonomike,me mekanizmat e duhur për të mbrojtur të gjithë individët ne nevojë, ose të përjashtuar nëpërmjet programeve parandaluese dhe riintegrimit social alternuar me skemat e punësimit. Plani synon zbutjen dhe lehtësimin e varfërisë, përmirësimin e cilësisë së jetesës së personave me aftësi të kufizuara dhe shtresave në nevojë. Zhvillimin e shërbimeve të kujdesit social. Ky plan ka si qëllim sigurimin e mbulimit të plotë të nevojave ekonomike dhe sociale të familjeve dhe individëve nëpërmjet programeve të mbrojtjes dhe zhvillimit social”. Duke u ndalur tek prioritet e Bashkisë Elbasan, kryebashkiaku shtoi se “prioritet i bashkisë është funksionimi i rrjetit të shërbimeve sociale, sigurimi i vazhdimësise së shërbimeve të ngritura dhe fuqizimi i tyre. Ngritja e shërbimeve të reja, përditësimi i të dhënave dhe analiza e situatës. Shërbimet Sociale të ngritura në Bashkinë Elbasan synojnë të mbulojnë më mirë nevojat e komunitetit.
Të ofrojnë shërbime sa më cilësore dhe në kohë për gratë dhe vajzat duke garantuar integrimin gjinor. Të sigurojnë mbrojtjen e fëmijëve të cënuar përmes shërbimeve parandaluese dhe mbrojtëse, të ofrojnë shërbime ditore dhe rezidenciale për PAK dhe të moshuarit e vetmuar.
Të fuqizojnë të rinjtë dhe grupet e margjinalizuara (rom/egjiptian) përmes pjesëmarrjes aktive në vendimmarrje dhe punësim”.
Duke thënë se Fondi Social është një instrument i rëndësishëm për njerëzit në nevojë, Drejtuesi Politik i PS për qarkun Elbasan, Damian Gjiknuri tha se, “mbrojtja sociale është gjë shumë e rëndësishme aq më tepër e shtrirë dhe bashkëpunuar në nivel lokal. Ky Fond i qeverisë i krijuar vitet e fundit po i vjen në ndihmë bashkive në këtë drejtim. Është dimension shumë i rëndësishëm”.
Fondi Social është mekanizmi financiar, nëpërmjet të cilit sigurohet mbështetje financiare për njësitë e vetëqeverisjes vendore, me qëllim, përmirësimin e standardeve të ofrimit të shërbimeve ekzistuese të kujdesit shoqëror; planifikimin e krijimin e shërbimeve të reja të munguara, si dhe zhvillimin e politikave sociale në nivel qendror dhe vendor. Një mekanizëm i tillë mundëson financimin në të gjithë territorin, duke balancuar edhe shpërndarjen e tij sipas nevojave në nivel lokal.
